Minority Safepack Südtirol Alto Adige Logo

Plu stersc deberieda!
Sustën nce tu la scunanza dla mendranzes te Europa.

Firma nce tu

Per mendranzes stersces te Europa

Tl’Union Europeica viv 50 milions de persones che fej pert de na mendranza nazionela o linguistica, danter chëstes iel nce la mendranzes linguistiches de Südtirol. La situazion particulera de scunanza de nosc raion garantida dal’autonomia che on, dëssa vester n bon ejëmpl nce per l’autra mendranzes te Europa che ne n’à nia i medemi dërc. Ulon dé n sëni sterch acioche la scunanza dla mendranzes te Europa giape na fundamënta normativa sterscia.

Südtirol ie per la mendranzes

Ti Stac dla UE depënd la scunanza dla mendranzes dala leges de uni Stat. Nëus ulon che nce l’Union Europeica posse se dé ju cun la scunanza dla mendranzes dajan ora leges aposta y perchël sustenion cun cunvinzion la abineda de firmes Minority Safepack metuda a jì dala FUEN (Federal Union of European Nationalities).

L se trata …
… dla scunanza dla mendranzes te Europa.
… dla gran cumpëida de rujenedes y cultures.
… de frabiché su n’Europa dla regions.

L Cunsëi provinziel de Bulsan à tëut la dezijion, de setëmber dl 2017, cun belau duc a una (mé una usc nia data ju) de sustenì ativamënter chësta scumenciadiva y de ti dé la ncëria ala Jonta provinziela de nfurmé avisa duta la populazion.

Tën pea y firma!

Tres chësta scumenciadiva zivica uelen purté la Cumiscion europeica a fé na pruposta de lege per chëi ciamps de scunanza dla mendranzes ulache la Union Europeica à la cumpetënza.

Acioche chësta scumenciadiva vele, muessela unì sustenida nchin ai 3 de auril 2018 da n milion de zitadins dla UE y da almanco 7 di 28 Stac dla UE respetan l lim minim udù dant per uni Stat. Per la Talia ie chësc lim de 54.750 firmes.

Chi possa pa firmé?

Duc i zitadins dla UE che à cumplì 18 ani.

Ula possen pa firmé?

a) Online sun la plata www.deberieda.bz
b) Ti chemuns y ti zëntri zivics de Südtirol, ulache l ie da garat i formuleres aposta y la urnes per abiné adum la zedules (dai 5 de merz inant).

Co firmen pa?

Leprò ala data y firma iel de bujën dé dant l inuem y cuinuem, la residënza, la data y l luech de nasciuda, la zitadinanza y l numer de n documënt de recunescimënt (cherta d’identità o passaport).

Desćëria l formuler
Lascia firmé l formuler a ti cumpanies y cunescënc
y dal ju te ti Chemun.